IMBC және KMG PetroChem бірлескен жұмысының нәтижелері: отандық тауар өндірушілерді дамыту және мұнай-газ химиясы саласындағы жеткізу тізбегін кеңейту

2026 жылғы 8 мамырда IMBC делегациясы «KMG PetroChem» ЖШС-мен бірлесіп, Қарағанды қаласындағы «KazFitting» ЖШС және «Profland» ЖШС отандық кәсіпорындарының өндірістік алаңдарына барды. Бұл сапар тараптардың локализацияны дамыту және қазақстандық өндірушілерді ірі мұнай-газ химиясы жобаларына интеграциялау бойынша жүйелі бірлескен жұмысының кезекті кезеңі болды.

2013 жылы негізі қаланған, 8000 м²-ден астам өндірістік алаңы бар және 70-ке жуық маманды жұмыспен қамтып отырған «KazFitting» зауыты мұнай-газ және химия өнеркәсібіне арналған қысыммен жұмыс істейтін сауыттарды, резервуарлық, колонналық және жылу алмасу жабдықтарын шығаруға маманданған.

Кәсіпорын бұған дейін IMBC жүргізген кешенді бағалаудан өткен болатын. IMBC-тің негізгі қатысушыларына, соның ішінде «KMG PetroChem» ЖШС-не дайындалып ұсынылған осы бағалау нәтижелері бойынша кәсіпорын халықаралық талаптарға жауап беретін, қысыммен жұмыс істейтін ыдыстардың перспективалы жеткізушісі ретінде анықталды.

IMBC және KMG PetroChem-нің дәйекті жұмысы аясында нақты практикалық нәтижелерге қол жеткізілді: «KMG PetroChem» Басқарма төрағасы Диас Диянов кәсіпорында газ айыру кешені жобасы үшін колонналар мен қысымды ыдыстарды жеткізуге тапсырыс орналастырылғанын атап өтті. Сонымен қатар, KMG PetroChem ынтымақтастықты кеңейтуді қарастыруда; зауыттың өндірістік қуаттары мен техникалық мүмкіндіктері магистральдық құбыржолдар жобасын іске асыру үшін әлеуетті жеткізушілер пулын қалыптастыру шеңберінде де зерттелуде. Бұл бағалау кезеңінен жергілікті өндірушіні жеткізу тізбегіне нақты интеграциялауға көшуді білдіреді.

Сапар бағдарламасына кабельдік қораптар мен металл конструкцияларын шығаруға маманданған «Profland» компаниясының өндірістік алаңына бару да енді. IMBC жүргізген талдау және салалық жұмыстардың нәтижесінде кәсіпорын мұнай-газ химиясы жобаларына арналған әлеуетті жеткізушілер пулына қосылды.

Бас директор Артем Слесаренконың айтуынша, кәсіпорын 2007 жылы құрылған және жұмыс істеу кезеңінде Қазақстан, Ресей, Өзбекстан және Қырғызстан аумағында 100-ден астам жобаны жүзеге асырған. Бүгінгі таңда компания 70-ке жуық қызметкерді жұмыспен қамтып отыр, 2 500 м² өндірістік алаңы бар, жыл сайын 6 500 тоннадан астам болат өңдеп, 15 000-нан астам өнім түрін шығарады.

Сапар барысында IMBC және KMG PetroChem өкілдері кәсіпорынның технологиялық желілерімен және өнім ассортиментін кеңейту мүмкіндіктерімен танысты. Тараптар сондай-ақ өндірісті одан әрі дамыту перспективаларын және IEC стандарттары бойынша халықаралық сертификаттау алу мүмкіндігін талқылады.

Сапар қорытындысы бойынша тараптар ынтымақтастықты одан әрі дамыту бойынша келісілген ұстанымдарын растады: IMBC кәсіпорындарға олардың өнімдерін ірі мұнай-газ химиясы жобалары операторларының талаптарына сәйкес келтіру бөлігінде сараптамалық және әдістемелік қолдау көрсетуді жалғастырады, ал KMG PetroChem өз жобаларын іске асыруға жергілікті өндірушілерді тарту мүмкіндіктерін қарастырады.

IMBC Бас директоры Дастан Әбішев қазіргі нәтижелер индустриялық серіктес пен халықаралық орталық арасындағы қалыптасқан өзара іс-қимылдың тиімділігін көрсететінін атап өтті: «IMBC және KMG PetroChem-нің бірлескен жұмысы бүгінгі күннің өзінде әлеуетті жеткізушілерді анықтап қана қоймай, оларды мұнай-газ химиясы саласындағы жобаларға практикалық тұрғыда тартуды қамтамасыз етуде».

Осылайша, IMBC және KMG PetroChem ынтымақтастығы кәсіпорындарды талдау арқылы бағалаудан нақты келісімшарттар жасасуға және ұзақ мерзімді индустриялық серіктестікке көшуді қамтамасыз ете отырып, ішкі елдік құндылықты дамытудың тұрақты моделін қалыптастырады.